၂၀၁၉ ခုနှစ်၊ နိုဝင်ဘာလ(၂၅) ရက်၊ရခိုင်ပြည်တိုက်ပွဲသတင်းများ



၂၀၁၉ ခုနှစ်၊ နိုဝင်ဘာလ(၂၅) ရက်နေ့၌ ပလက်ဝ၊ ကျောက်တော်၊ ရသေ့တောင်၊ပုဏ္ဏားကျွန်းမြို့နယ်များ၌တိုက်ပွဲများဆက်လက်ရှိနေခဲ့သည်။ နိုဝင်ဘာလ(၂၅) ရက်တစ်နေ့တည်းတွင် မြန်မာ့တပ်မတော်ဖက်မှ (မိမိတို့မှတ်တမ်းများအရ) မျက်မြင်သေဆုံးသူ(၁၅) ဦးအထက်ရှိခဲ့သည်။

၂၀၁၉ ခုနှစ်၊ နိုဝင်ဘာလ(၂၄) ရက်၊ ညသန်းခေါင်(၁၂) နာရီပတ်ဝန်းကျင် တွင်ရက္ခိုင့်တပ်တော်မှ ပလက်ဝမြို့နယ်၊ကျောက်ဖျာရွာ နှင့် ဆင်အိုးဝရွာအကြားနှင့် နိုဝင်ဘာလ(၂၅) ရက်၊နံနက်(၁) နာရီ(၂၈) မိနစ်အချိန်တွင် ကျောက်တော်မြို့နယ်၊ ပြိုင်းတိုင်ရွာ နှင့် တင်းမရွာသစ်အကြားတွင် မြန်မာ့တပ်မတော်၏ စစ်သည်၊စစ်လက်နက်ပစ္စည်းများ၊ စစ်အသုံးအဆောင်ပစ္စည်းများ၊ရိက္ခာများကို ပလက်ဝသို့ ပို့ဆောင်ပြီးပြန်ဆင်းလာသော စစ်သဘောင်္(၃) စီး၊ Speed Boat (၂)စီးပါစစ်ရေယာဉ်စုအားရက္ခိုင့်တပ်တော်မှလက်နက်ကြီးများဖြင့် ဒုတိယအကြိမ်နေရာ(၂) နေရာ၌ရှေ့ဆင့်နောက်ဆင့်ထပ်မံတိုက်ခိုက်ခဲ့သည်။

အဆိုပါ စစ်ရေယာဉ်စုအား ၂၀၁၉ ခုနှစ်၊ နိုဝင်ဘာလ(၂၄) ရက်၊ (မိုးလင်းအာရုံ) နံနက်(၃) နာရီ(၅၅) မိနစ်အချိန်တွင်ပလက်ဝမြို့နယ်၊ "ကျောက်ဖျာရွာ"အနီး၌ ရက္ခိုင့်တပ်တော်မှပထမအကြိမ်တိုက်ခိုက်ခဲ့သည်။

ထို့နောက်မြန်မာ့တပ်မတော်၏စစ်သဘောင်္များသည် မြစ်ကမ်းနံဘေးတလျှောက်စစ်သဘောင်္များပေါ်မှရမ်းသန်းပစ်ခတ်တိုက်ခိုက်ခဲ့သောကြောင့် ကျေးရွာများအတွင်းရှိလူနေအိမ်များပျက်စီးခဲ့ပြီးအရပ်သားအချို့အားထိခိုက်ဒဏ်ရာရမှုများရှိခဲ့သည်။


မြန်မာ့တပ်မတော်သည် စစ်သည်၊လက်နက်ခဲယမ်း၊ရိက္ခာအပြောင်းအရွှေ့များတွင် ကုန်းလမ်းအားမသုံးရဲတော့၍ ရေလမ်းကြောင်းများမှတဆင့်ညအချိန်များ၌ခိုးကြောင်ခိုးဝှက်သွားလာနေကြရသည်။ ရက္ခိုင့်တပ်တော်အနေဖြင့် တိုက်ပွဲဖြစ်ပွားနေသောဒေသ၊ မြန်မာ့တပ်မတော်၏ထိုးစစ်ဆင်တိုက်ခိုက်မှုပြုလုပ်နေသောဒေသ၊ ညမထွက်ရအမိန့်ထုတ်ပြန်ထားသောဒေသများ၌ စစ်ဆင်ရေးကာလအတွင်း စစ်ရေးလိုအပ်ချက်အရယခုကဲ့သို့တိုက်ခိုက်ရခြင်းဖြစ်သည်။

တပြိုင်နက်တည်းတွင် ကုန်းလမ်း၊ရေလမ်း ခရီးသွားလုပ်ငန်းများကိုလုပ်ကိုင်နေကြသောလုပ်ငန်းရှင်များအနေဖြင့် ယခုကဲ့သို့ညအချိန်များ၌ ခိုးကြောင်ခိုးဝှက်ခရီးသွားလာခြင်းများမပြုကြရန်ထပ်မံအသိပေးအပ်ပါသည်။

၂၀၁၉ ခုနှစ်၊နိုဝင်ဘာလ(၂၅) ရက်၊ နံနက်(၉) နာရီ(၃၀) မိနစ်တွင် ရသေ့တောင်မြို့နယ်၊ အမျက်တောင်ရွာအနီးတွင် အမျက်တောင်ရွာအားမီးရှို့ဖျက်ဆီးခဲ့သော စစ်ရာဇဝတ်နယ်ချဲ့တပ်ဖွဲ့( မြန်မာ့တပ်မတော်) အား သတိပေးတိုက်ခိုက်ခဲ့သည်။

ရသေ့တောင်မြို့နယ်တောင်ဖက်၊ (၂.၆) ကီလိုမီတာအကွာအဝေးရှိ မေယုမြစ်အတွင်း ရန်သူ့စစ်ရေယာဉ်စုအား နေ့လည်(၃) နာရီ(၁၀) မိနစ်တွင် ရက္ခိုင့်တပ်တော်မှ နောက်ထပ်တစ်ကြိမ်ထပ်မံတိုက်ခိုက်ခဲ့သည်။

ထို့အပြင် လက်နက်ကြီးများပစ်ခတ်တိုက်ခိုက်နေသော ရသေ့တောင်မြို့၊အခြေစိုက် ခမရ (၅၃၆) နှင့် ခမရ(၅၃၇) တပ်ရင်းတို့အား ညနေ(၆) နာရီခန့်တွင်တစ်ကြိမ်၊ည(၈) နာရီ (၁၅) မိနစ်တွင်တစ်ကြိမ် ရက္ခိုင့်တပ်တော်မှ ပစ်ခတ်တိုက်ခိုက်ခဲ့သည်။

၂၀၁၉ ခုနှစ်၊နိုဝင်ဘာလ(၂၅) ရက်၊ နံနက်(၁၀) နာရီ(၁၀)မိနစ် မှစ၍ နယ်ချဲ့ကျူးကျော်သူမြန်မာ့တပ်မတော်၏စစ်ကြောင်းတစ်ခုသည် ပုဏ္ဏားကျွန်းမြို့နယ်၊ "ကြက်ချေးရွာ" အနောက်မြောက်ဖက်(၁.၈) ကီလိုမီတာအကွာအဝေးရှိမိမိတိုလှုပ်ရှားစစ်ကြောင်းတစ်ခုအား ထိုးစစ်ဆင်တိုက်ခိုက်မှုကိုစတင်ပြုလုပ်ခဲ့သည်။ ရန်သူသည် အဆိုပါနေရာအား ကန်ဇောက်၊ရသေ့တောင်-ရေစိုးချောင်းဗျူဟာအပါအဝင် နေရာ(၃) နေရာမှ လက်နက်ကြီးများစုပြုံပစ်ခတ်နေခဲ့သည်မှာ (၄/၅) ရက်ခန့်ရှိပြီဖြစ်သည်။ နိုဝင်ဘာ(၂၅) ရက်တွင်မှ ရဟတ်ယာဉ်(၂) စီးအပါအဝင် မြေပြင်၊ဝေဟင်မှထိုးစစ်ကိုစတင်ပြုလုပ်ခြင်းဖြစ်သည်။ ရက္ခိုင့်တပ်တော်မှ သတ္တိပြောင်မြောက်စွာဖြင့် ရန်သူ့ထိုးစစ်အားအကောင်းဆုံးဟန့်တားတိုက်ခိုက်နိုင်ခဲ့သည်။

ဘူးသီးတောင်မြို့နယ်၊ "ဆင်သေပြင်ရွာ" မြောက်ဖက်၊ (၆၅၀) မီတာအကွာအဝေးရှိ ရန်သူအား ည(၁၀) နာရီ(၃၅) မိနစ်တွင် ရက္ခိုင့်တပ်တော်မှ မိနစ်(၃၀) ခန့်သွားရောက်တိုက်ခိုက်ခဲ့သည်။ အထိအခိုက်အကျအဆုံးများကိုမသိရသေးပါ။

သတင်းနှင့်ပြန်ကြားရေး ရက္ခိုင့်တပ်တော်