Sep 9, 2019
ညီနောင်မဟာမိတ်(၃) ဖွဲ့အနေဖြင့် မြန်မာစစ်တပ်အား လက်ဦးမှုယူ၍ထိုးစစ်ဆင်တိုက်ခိုက်ခြင်းကိုမပြုလုပ်သော်လည်း မြန်မာစစ်တပ်မှ မိမိတို့အား စတင်တိုက်ခိုက်ခြင်း၊ ရန်စတိုက်ခိုက်ခြင်းများကိုဆက်လက်ပြုလုပ်လျှက်ရှိသည်။
ထို့အပြင် မြန်မာစစ်တပ်သည်လက်နက်ကြီးအမြောက်အမြားဖြင့်စုပြုံပစ်ခတ်တိုက်ခိုက်ခြင်းကိုလည်း ရခိုင်၊ရှမ်းမြောက်ဒေသများ၌ဆက်လက်ပြုလုပ်နေဆဲဖြစ်သည်။ဤကဲ့သို့ မြန်မာစစ်တပ်ဖက်မှမိမိတပ်ဖွဲ့ရှိရာသို့ ထိုးစစ်ဆင်တိုက်ခိုက်မှု၊ လက်နက်ကြီးများဖြင့်ပစ်ခတ်တိုက်ခိုက်မှုများကြောင့်မိမိတို့ဖက်မှ ကျဆုံးသူ နှင့်ထိခိုက်ဒဏ်ရာရသူအချို့ရှိခဲ့သည်။
(၁)၂၀၁၉ ခုနှစ်၊ စက်တင်ဘာလ(၉) ရက် နေ့လည် (၁၀း၄၀)နာရီ နှင့် (၁၃:၂၅) နာရီအချိန်များတွင်ကွတ်ခိုင်မြို့နယ် နမ့်ဖတ်လွန်းရွာ အနီးရှိ မိမိတို့တပ်ဖွဲ့ဝင်များရှိရာနေရာသို့ မြန်မာစစ်တပ်၏ တပ်မ (၈၈) လက်အောက်ခံ၊ခမရ ၄၁၅/၄၁၆ ပူးပေါင်းတပ်သည် နှစ်ကြိမ်တိုင်တိုင်လာရောက်တိုက်ခိုက်ခဲ့သည်။ ထို့ကြောင့်မိမိတို့ဖက်မှ ထိခိုက်ဒဏ်ရာရသူအချို့ရှိခဲ့သည်။
(၂) ထို့အတူ နေ့လည် (၁၃း၀၀)နာရီတွင်မြန်မာစစ်တပ်၏ တပ်မ(၁၀၁) လက်အောက်ခံ၊ ခလရ(၂၅၅) တပ်ရင်းသည် နမ့်ဆန်မြို့နယ် တောင်မကျေးရွာလမ်းခွဲရှိ မိမိတို့တပ်ဖွဲ့ဝင်များရှိရာနေရာသို့ လာရောက်တိုက်ခိုက်ခဲ့သောကြောင့် နာရီဝက်ခန့်တိုက်ပွဲဖြစ်ပွားခဲ့သည်။
ရခိုင်ဒေသအတွင်း၌လည်း မြန်မာစစ်တပ်ဖက်မှ စစ်ရေးလှုပ်ရှားမှုမရှိသည့်နေ့ရက်များ၌တိုက်ပွဲများမရှိသော်လည်းစစ်ရေးလှုပ်ရှားမှုရှိသည့်နေ့ရက် များတွင် တိုက်ပွဲများရှိခဲ့သည်။
၂၀၁၉ ခုနှစ်၊ စက်တင်ဘာလ(၉) ရက်နေ့မှ စတင်ပြီး မိမိတို့ညီနောင်မဟာမိတ်(၃) ဖွဲ့အနေဖြင့် တစ်ဖက်သတ်အပစ်အခတ်ရပ်ဆိုင်းခြင်းအား တစ်လတာကြေညာခဲ့ပြီးမိမိကိုယ်မိမိခုခံကာကွယ်သောအနေအထားမျိုးဖြင့် တုံ့ပြန်သွားမည်ဖြစ်ကြောင်း ထုတ်ပြန်ကြေညာခဲ့သည်။
သို့သော်လည်း ၂၀၁၉ ခုနှစ်၊ စက်တင်ဘာလ(၉) ရက်၊ ညနေ(၁၆:၀၀) နာရီတွင် ရခိုင်ပြည်၊မြောက်ဦးမြို့နယ်၊ ကျောက်ကျပ်ရွာ အနီးရှိမိမိတို့ရှိရာနေရာသို့ မြန်မာစစ်တပ်ဖက်မှ ကျူးကျော်ဝင်ရောက်လာသောကြောင့် နှစ်ဖက်ထိတွေ့တိုက်ခိုက်မှုဖြစ်ပွားခဲ့သည်။ မြန်မာစစ်တပ်သည် ၎င်းထိတွေ့မှုဖြစ်ပွားရာနေရာပတ်ဝန်းကျင်၌ရှိသော ရပ်ရွာအတွင်း လက်နက်ကြီး၊ လက်နက်ငယ်များဖြင့်ရမ်းသန်းပစ်ခတ်တိုက်ခိုက်ခဲ့သည်။
မြန်မာစစ်တပ်ဖက်မှ မိမိတို့ရှိရာနေရာများသို့ ယခုကဲ့သို့ လက်ဦးမှုယူကာ ထိုးစစ်ဆင်တိုက်ခိုက်ခြင်း၊ရန်စတိုက်ခိုက်ခြင်း၊ကျူးကျော်ခြင်းများဆက်လက်ရှိနေမည်ဆိုပါက မလွဲမရှောင်သာခုခံကာကွယ်တိုက်ပွဲများဆက်လက်ရှိနေအုံးမည်ဖြစ်သည်။
ညီနောင်မဟာမိတ် (၃) ဖွဲ့
MNTJP/MNDAA, PSLF/TNLA, ULA/AA